Tag Archives: իրան

ՍԱՐԴՈՒ, հայաբնակ գյուղ Իրանում, Ղարադաղ գավառում։ XX դ. սկզբին ուներ 216 հայ բնակիչ (44 տուն)։ Զբաղվում էին այգեգործությամբ, հացահատիկի տարբեր տեսակների մշակությամբ, անասնապահությամբ , արհեստներով, առևտրով։ Գյուղում կար եկեղեցի՝ կից դպրոցով։ Բնակիչները 1946-ին ներգաղթել են Սովետական Հայաստան։

ՍԱՐԴԱՌՈՒԹ, հայաբնակ գյուղ Իրանում, Բարանդուզ գավառում։ XX դ. սկզբին ուներ 130 բնակիչ (20 տուն)։ Զբաղվում էին այգեգործությամբ, հացահատիկի մշակությամբ, անասնապահությամբ, արհեստներով, առևտրով։ Գյուղում կար եկեղեցի՝ կից դպրոցով։ Բնակիչները 1946-ին ներգաղթել են Սովետական Հայաստան։

ՀԱԶԿԵՐՏ II (ծն. թ. անհտ.–457), պարսից արքայից արքա 439-ից։ Սասանյանների դինաստիայից։ Նրա օրոք պետության փաստական ղեկավարն էր վազուրդ-ֆրամաթար (հազարապետ) Միհրներսեհը։ 

ՀԱԶԿԵՐՏ I Բազահքար (բառացի` մեղսագործ) (ծն. թ. անհտ.— 421), պարսից արքայից արքա 399-ից։ Սասանյանների դինաստիայից։ Գահակալության առաջին շրջանում պայքարել է բարձր ազնվականության և հոգևորականության դեմ։ Հազկերտ I դարձել է Բյուզանդիայի ապագա կայսր Թեոդոսիոս II-ի խնամակալը։

ՀԱԶԱՐՋՐԻԲ, հայաբնակ գյուղ Իրանում, Փերիա գավառի Գորջի գավառակում։ Բնակիչները բերվել են Արևելյան Հայաստանից 1603-ին, շահ Աբբաս 1-ի բռնագաղթի ժամանակ։ XVIII դ. հիշվում է որպես եկեղեցական թեմի կենտրոն։ Հազարջրիբի Ս. Աստվածածին վանքում էր նստում թեմի առաջնորդը։

ՀԱԴԱՆ, հայաբնակ գյուղ Իրանում, Սպահանի նահանգի Փերիա գավառում։ Առաջին անգամ հիշատակվում է 1720-ական թթ.։ 1970-ին ուներ 102 տուն (657 հոգի) հայ բնակիչ։ Գյուղում կա եկեղեցի (Ս. Գրիգոր, 1729), որտեղ պահվում են երկու ձեռագիր Ավետարան։